Hierünner steit allens to de Lizens vun de Flagg un wat een beachten mütt, wenn een eer bruken will.

De Sassenflagg is dat meensame Symbool vun Plattdüütsch un de plattdüütsche Sprekergrupp. Se is 2013 vun Kevin Behrens opstellt worrn un steit ünner de Lizens CC BY-SA 4.0 Creative Commons Naamsnömen – Weddergaav ünner desülvigen Bedingens.

Dat heet, dat se vree bruukt, wiest, druckt, ophangt, weddergeven un inbunnen warrn dörv. Generell mütt hierbi de Naam un de Lizens angeven warrn. Se is oorheverrechtlich schuult un dörv nich as Mark oder Logo registreert warrn.

De Bunnsraat för Nedderdüütsch (BfN) (tosamen mit dat Nedderdüütschsekretariat) is de offitschelle Vertreder vun de plattdüütsche Sprekergrupp un hannelt in de’eer Intress. He hett de Flagg 2025 as offitschelle Repräsentatschoon vun Plattdüütsch un de nedderdüütsche Sprekergrupp wäält. Daarso hebbt de BfN un dat Nedderdüütschsekretariat dat duurhafte, uninschränkte, nich-exklusieve Bruukrecht an de Sassenflagg. Bloots de un de Oorhever sünd daarmit generell vun de Nömensplicht uutnamen un köönt eer daarmit vree un offitschell in all Domänen bruken.

De Lizens gifft een so an:

„Sassenflagg © Bunnsraat för Nedderdüütsch / Kevin Behrens – Lizenz CC BY-SA 4.0“.

Wenn een sik nich op den Bunnsraat för Nedderdüütsch betrecken will, is düsse Foorm ook tolaten:

„Sassenflagg © Kevin Behrens – Lizenz CC BY-SA 4.0“.

Anner Saken to beachten bi de Nömensplicht

Dat gifft ook anner Lüüd un Brüük, de vun de Nömensplicht uutnamen sünd.
> Is de Bruuk privaat un symboolsch oder dekoratiev (privaat Hissen vun de Flagg, Teken an de Kledaasch oder de Flagg as lütten Tosats op dat Profielbild etc.), mööt de Oorhever un Lizens nich nöömt warrn.

> Wenn de Bruuk mediaal oder wetenschopplich is, warrt de Nömen un Lizens düüdlich wünscht.

> Wenn de Flagg offitschell oder kummertschell bruukt warrt, mütt de Lizens in een „an de Situatschoon anpasste Maneer“ angeven warrn. Dat heet: Wo dat as Tosats passen deit, in Drucksaken oder Websteden, mööt de Naam un Lizens angeven warrn, to‘n Bispell in en Vootnoot, Bildünnerschrift oder dat Bornverteeknis. Daar, wo de Angaav meist unmööglich is (t. B. wenn keen Plats för de Nömen daar is, as bi en offitschelle Hissen vun de Flagg bi en Behöörd), kann dorvun afseen warrn.

> Wenn de Flagg en düüdlichen Deel vun en Verkoopsprodukt is (t. B. en Sticken mit de Flagg op), mütt de Naam un de Lizens an en egente Steed angeven warrn, to’n Bispell ünner dat Produktbild oder den Verkoopstext.

> Een mütt den Naam un de Lizens nich angeven, wenn de Flagg as lütt Icon oder Beteken för de Spraak bi Översettens, Henwiesens för Spraakutwaal, Websteedfavicons, Achtergrundelementen oder Menüsymbolen bruukt warrt. Dat gellt ook för anner sekundäre Sinnen, to’n Bispell Navigatschoon oder Orienteren, wenn een de Flagg hier in lütte Grött bruken deit. Is se en Deel vun en grötter Design un steit düüdlich nich in’n Fokus daarvun, kann een ook vun de Nömen afseen.

> Warrt de Flagg afwannelt oder bearbeidt, mütt dat ne’e Produkt ünner desülvige Lizens as düsse staan.

Oorheverrecht

Dat Oorheverrecht warrt hiervun nich anraakt. Dat heet, wenn een de Flagg so verännert, verfälscht oder bruukt, dat se in eer Bedüden düüdlich vertrocken oder gegen den egentlichen Sinn bruukt warrt un de Neutraliteet nich meer sekerstellt is (to’n Bispell för en extremistsche oder anti-demokraatsche Bottschopp), oder wenn dat den Oorhever oder den Oorsprung in en verkeert Licht rücken deit (to’n Bispell den Kuntext vun de Flagg verkeert benöömt, so as „Teken vun de [völksche un antisemietsche] nedderdüütsche Bewegen“ Anvang vun’t 20ste Jaarhunnerd), denn verstött dat gegen § 14 UrhG. Datsülvige gellt ook denn, wenn een fälschlicherwies sien egen Copyright för de Flagg angeven oder den egentlichen Oorhever verbargen dee. Een kann ook keen kummertschell Copyright op de Flagg anmellen oder de Flagg as egen Mark indregen. Anner Gruppen, Institutschonen oder Personen köönt eer ook nich as de’eer egen Logo uutgeven. Düsse Bruuk vun de Flagg bruukt de Tostimmen vun den Oorhever.

Den helen Text för de reguläre Lizens aan düsse Aflaatregeln vinnt een hier op Düütsch: https://creativecommons.org/licenses/by-sa/4.0/deed.de

All Aflaatregeln vun baven, de över de CC BY-SA 4.0 Lizens ruutgaat, hebbt as apentliche Willensverklaren solang Bestand, as se hier op de Sied staat. Se gellt nich meer, wenn se vun de Sied namen sünd oder sik düsse Tosatsregeln ännert. Ole Brüük na düsse Regeln blievt hiervun unanraakt, wenn se sik ännert hebben schullen.

Du büst di unseker, wat du allens richtig deist mit de Angaav vun de Lizens? Oder bruukst de Tostimmen vun den Oorhever?
Denn schriev uns doch geern an: kuntakt@sassenflagg.de oder info@niederdeutschsekretariat.de.